如果某日你發現天花板裂開，伸出一隻疑似「人類的手」，你會點做？係靈異事件，定係有其他可能？最近東京都三鷹市有戶人家就真實經歷咗呢個「詭異場面」，不過當佢哋睇清楚之後，發現…竟然係浣熊！
半夜怪聲+詭異「手掌」＝住客嚇到唔敢瞓
屋主表示：「凌晨經常聽到奇怪聲音，搞到瞓唔好，有時仲會聽到好似有動物打交咁。」本來以為係老鼠或者雀仔，但當佢見到天花板裂縫伸出一隻「白色手掌」，即刻心都寒埋，仲以為撞鬼！結果搵專業人士嚟睇，先發現原來係一隻超靈活嘅浣熊。
專家：浣熊隻手同人類好似，仲識拆屋？！
負責處理事件嘅害獸驅除公司 House Protect專家Shun Iwata解釋：「浣熊嘅前肢真係好似人手，手指又長又靈活，仲識拆嘢！佢哋甚至可以拆走排氣扇、鬆開通風口，然後成功潛入屋企！」佢又話：「好多時客廳上方嘅天花板，或者冷氣、暖氣機附近，最容易畀浣熊霸佔。」
「睇落可愛，但千祈唔好摸！」
好多日本人對浣熊嘅印象，來自童年動畫《小浣熊拉斯卡爾》，覺得佢哋可愛又精靈。不過 Shun Iwata 直言：「係，佢哋睇落真係幾可愛，但只係樣靚啫！千祈唔好行埋去，特別係屋企有小朋友嘅話！」
佢再補充：「浣熊其實好驚人，平時會避開，但如果你挑釁佢，佢就會出手攻擊！」最恐怖係，浣熊身上充滿寄生蟲、病毒，甚至可能帶有狂犬病。Shun Iwata 提醒：「一旦畀浣熊咬或者抓傷，病毒可以透過傷口入侵人體，後果好嚴重！」所以，最安全做法係遠離，千祈唔好伸手去摸
東京都一年捕獲千幾隻浣熊，數量仲不停上升！
因為浣熊係特定外來生物，影響本地生態，政府近年大力處理呢個問題。單計東京都，2023年已經捕獲咗1300隻浣熊，數量不斷增加。Shun Iwata 亦透露，由於法例規定，浣熊通常只能趕走，而唔可以隨便搬走，令到處理上有啲無奈：「好多時都只能夠想辦法趕走佢哋，但呢種方法未必長遠解決問題。」
%20(1).png)
