美國亞利桑那州近日發生一宗驚心動魄但又充滿溫情的事件，一名僅僅兩歲大的男童Boden Allen，竟然在荒野中失蹤整整16個小時，走了超過七英里，途中更疑似經過有山獅出沒的地帶。幸運的是，一隻住在附近牧場的狗狗——Buford，成功將他帶到安全地點，結束了這場驚魂記。
事情發生在亞利桑那州Seligman一帶，一個距離大峽谷國家公園約一百英里的小鎮。當地警方Yavapai縣警長辦公室表示，事件發生在星期一下午五時左右，Boden的母親當時正在家門外與他玩耍，期間因要為另一名小孩換尿片而短暫返回屋內，估不到轉眼間，Boden竟然不見了蹤影。
據副警長Jeff Newnum接受訪問時指出：「她只是花了大約10分鐘去換尿片，低頭一看，發現Boden已經唔見咗，唔喺屋企入面。」
警方立即展開大規模搜救行動，動員超過40位搜救人員及多位警員，通宵達旦搜尋16小時。搜索過程中，他們甚至在Boden疑似行走過的地帶發現兩隻山獅的蹤影，可想而知環境之險惡。
而真正發現Boden的，並唔係搜救隊，而係一隻叫Buford的狗。
牧場主人Scotty Dunton向當地警長辦公室表示：「我出門口準備駕車去鎮上，見到隻狗坐喺入口，然後抬頭一望，個細路竟然就企喺佢隔離。」
原來，Buford係一隻六歲大的安納托利亞牧羊犬混有比利牛斯犬血統，平時負責巡邏牧場，防止郊狼侵襲。Dunton表示：「佢成晚會喺屋附近半英里範圍巡邏，趕走郊狼。」
當日早上，Buford如常巡邏，發現咗獨自在野外的Boden，並一路陪伴住佢，最終將佢引導到Dunton牧場。
「我問佢：『你係咪行咗成晚？』 佢話唔係，佢話：『我訓咗喺棵樹下。』 然後我再問：『係咪我隻狗搵到你？』 佢答：『係。』」
牧場主人即時將Boden帶入屋，提供食物及清水，並通知警方。其後他親自沿途追蹤Boden的腳印，更發現Buford一路都有陪住Boden，足足同行咗一英里。
Dunton感慨道：「我真係唔敢相信個小朋友行咗咁遠。七英里，如果係直線都已經好勁啦。中間仲要經過三個大山脈同好多山谷，兩歲小朋友做到呢啲，簡直匪夷所思。」
警方表示，Boden最終身體狀況良好，只係有少量擦傷同輕微脫水，已經與父母團聚。當局形容父母當時「極度焦急」，重聚一刻更忍唔住落淚。
對於Buford的英勇行動，警方將於稍後專程探訪，並承諾會送上一份「大牛扒加蝴蝶結」作為獎勵，感謝牠在今次事件中所展現的忠誠與守護。
